Ghazal - Dil Say Ho Sarf e Nazar Shokh Sukhan Hai Keh Nahi

April 28, 2007 on 9:04 pm | In Poetry |

غزل

دل سے ہو صرفِ نظر شوخ سخن ہے کہ نہیں

یہ کسک دیکھ ذرا جزو متن ہے کہ نہیں

ایسے بے فیض سفر میں ہی گزر جائیںگے؟

آبلہ پاؤں کا بھی کوئی وطن ہے کہ نہیں

زیبِ تن سے ہمیں فرصت جو ملے تو دیکھیں

دلِ مردہ کو میسر بھی کفن ہے کہ نہیں

خلعتِ غم تو عطا کردی مگر سوچ ذرا

ایسی پوشاک کے شایاں یہ بدن ہے کہ نہیں

تیکھے لفظوں کی ترے کاٹ، سنا باقی ہے

جانے لہجے میں ترے اب وہ چبھن ہے کہ نہیں

تری ضو سے جو فروزاں ہے مرا مہرِ حیات

مرے خوں سے ترا گل رشکِ چمن ہے کہ نہیں

مانگ کر میں نے گزاری نہیں کیا عمر تمام؟

مرا ہر لمحہ ترے پاس رہن ہے کہ نہیں

Presentation of Urdu Poetry Forum - Get RSS Feed: Entries and comments feeds. ^Top^