Aik Lamha

Nazam - Yehee Woh Akhri Hud Hai

Admin — Sat, 28 Apr 2007 21:10:04 +0000

یہی وہ آخری حد ہے

جہاں سے ساتھ دینے کی ادائیں لوٹ آتی ہیں

جہاں سے زندگی کی سب دعائیں لوٹ آتی ہیں۔

جہاں پر حوصلے دیتی نصیحت کچھ نہیں ہوتی

جہاں الفاظ میں گندھی سی ندرت کچھ نہیں ہوتی۔

یہی وہ آخری حد ہے۔

کہ جس کے پار چلے جانے والے ایسے جاتے ہیں

کہ چاہے کتنے بھی آنسو بہا لیں ، گڑ گڑا لیں ہم۔

پلٹ کر وہ نہیں آتے۔

یہی وہ آخری حد ہے۔

جہاں پر دوست کا دستِ عنایت چھوڑنا ہی ہے۔

جہاں پر ہم رکابی کے ارادے بے معانی ہیں۔

جہاں سے زندگی کو اُلٹے قدموں دوڑنا ہی ہے۔

جہاں ہر سمت پر بس موت ہی کی حکمرانی ہے۔

یہی وہ آخری حد ہے۔

کہ جس کے پار جانے والے کو کتنے ہی پیارے ہوں۔

ہمیں اک بار پلٹ کر بھی صدا دے نہیں سکتا۔

فقط اک بار پلٹ کر بھی دعا دے نہیں سکتا۔

ہمارے کپکپاتے لب ، ہماری بھیگتی پلکیں

ہمارے دستِ لرزیدہ، ہماری اشکبار آنکھیں

چلو اِن کی زبانوں کو ملا کر اک دعا مانگیں!

’یہی وہ آخری حد کامسافر ہے میرے اللہ!

تو اپنی خاص رحمت سے ، اسے جنت مکاں کرنا۔۔‘

سنو! اشکوں کے سائے سے نکلتی ہوئی دعاؤں کی

کوئی سرحد نہیں ہوتی۔

چلو سب اپنے اشکوں کو دعا میں ڈھال لیتے ہیں۔

Ghazal - Yeh Dil e Sabar Kanaan Aur Woh Sitam Paysha Nigah

Admin — Sat, 28 Apr 2007 21:09:25 +0000

غزل

ایسے پر درد تعلق کا ہمیں غم ہے کہ آہ

یہ دلِ صبر کناں اور وہ ستم پیشہ نگاہ

پھر سے سہمے کہیں، جاتے ہیں اُمیدوں کے گلاب

پھر سے نکلی ہے کسی شخص کی یادوں کی سپاہ

تو نے ہی بارِ گراں غم کا اُٹھایا تھا کبھی

سو گلہ اب دلِ مضطر کا نہ کر، وعدہ نباہ

سفرِ عشق میں ہمراہی بہت مشکل ہے

کہ کسی شخص کی منزل ہے کسی اور کی راہ

کتنی دلکش تری دنیا ہے مگر دارِ فنا

کتنا روشن یہ تیرا دن ہے مگر، رات سیاہ

Ghazal - Anjam Fasanay Ka Yeh chaha Tu nahi Tha

Admin — Sat, 28 Apr 2007 21:08:37 +0000

غزل

انجام فسانے کا یہ چاہا تو نہیں تھا

ہم تم سے بچھڑ جائیں گے سوچا تو نہیں تھا

یہ بات الگ ہے کہ سزا جھیل رہا ہوں

اے دوست تجھے بھول کے جینا تو نہیں تھا

تو اشک بہاتا ہے یہاں موسمِ گل میں

کوئی خواب تیرا بھی کہیں ٹوٹا تو نہیں تھا؟

پھر آج دعاؤں میں اثر آنہ سکا کیوں؟

پھر آج کسی نے تجھے مانگا تو نہیں تھا؟

وہ آج یوں تڑپا ہے کہ قابو میں نہ آیا

دل تھا تو ستمگر مرا اتنا تو نہیں تھا

پھر موجِ صبا لائی ہے مانوس سی خوشبو

تو نے کہیں چھو کراُسے بھیجا تو نہیں تھا؟

جو سن کے ہنسے ہو مری رسوائی کا قصہ

لفظ آپ ادا ہو گئے ، کہنا تو نہیں تھا

صدیوں سے رگ و پے کا جو آزار بنا ہے

ایسے کبھی ہجرِ رواں ٹھیرا تو نہیں تھا

کرتانہ جنوں خیز اُسے خونِ جگر سے

ایسا بھی میرا یاد سے جھگڑا تو نہیں تھا

دل آج مجھے پھر سے اکیلا سا لگا تھا

تو بھی اُسی ساعت کہیں تنہا تو نہیں تھا؟

یادوں کے سفینوں نے کیا رُخ کیوںذہن کا؟

جاتے کسی لمحے کو پکارا تو نہیں تھا؟

Ghazal - Anjaam e Mohabbat Tujhay Ruswa Na Karain Gai

Admin — Sat, 28 Apr 2007 21:07:58 +0000

غزل

انجامِ محبت تجھے رسوا نہ کریں گے

ہم اب کبھی جینے کی تمنا نہ کریں گے

ہوجائیں گے درگور خطا کار جو ٹھیرے

ہم آپ کی دنیا میں تماشا نہ کریں گے

کس موڑپہ مل جائیں کسی یاد کے آنسو

ہم خواب کے دامن سے یوں نکلا نہ کریں گے

ہم دل کو بنا لیں گے گزر گاہ کہ جس میں

جگنو کسی کی یاد کے اترا نہ کریں گے

یہ آپ کے دیوانے کا اعجاز رہے گا

غم آپکی گلیوں سے بھی گزرا نہ کریں گے

ہاں دل کو تمنا ہے اُسی روز کی جس میں

سپنے کسی کے ٹوٹ کر بکھرا نہ کریں گے

گر آپ حسیں جلو وں کو پابند کریں کچھ

ہم آپ کی قربت میں یوں بہکا نہ کریں گے

ہم وقت کے دریامیں صنم تم کو بہا دیں؟

گر یاد ستمگر بھی ہو ایسا نہ کریں گے

کچھ وقت لگے گا کہ زخم بھرنے لگیں گے

ہاں یاد کریں گے تمہیں ،اتنا نہ کریں گے

Nazam - Aye Mairay Payar Lamha Jee

Admin — Sat, 28 Apr 2007 21:07:20 +0000

اے میرے پیارے لمحہ جی!

یہ اجڑی سی، یہ بکھری سی،

تم آس لگائے پھرتے ہو۔

بستی بستی ، گلیوں گلیوں،

کیوں خاک اڑائے پھرتے ہو؟

سب دھندلایا ،اب بھر پاؤ،

کہ خاک اُڑاناچھوڑو بھی!

اے میرے پیارے لمحہ جی!

اب خواب کا دامن چھوڑو بھی!

ہاں یہ مانا وہ دن بھی تھے،

جب دل اپنوں نے توڑا تھا،

اپنے دل پر تم نے جب سے،

اس جوگ کا چولا اوڑھا تھا،

پر اب کاہے تم سینے پر،

یہ روگ سجائے بیٹھے ہو؟

کیوں بھولی بسری باتوں پر،

اک ڈھونگ رچائے بیٹھے ہو؟

کئی سال ہوئے دِن بیت گئے،

یہ ڈھونگ رچانا چھوڑو بھی!

اے میرے پیارے لمحہ جی!

اب خواب کا دامن چھوڑو بھی!

اے لمحہ جی کچھ دیکھو تو،

جو اپنے غم میں واری ہے،

جو آنکھ سے اوجھل کردی ہے،

وہ دنیا کتنی پیاری ہے۔

جب جیون پاس بلاتا ہے،

تو جاؤ ، کاہے دور کھڑے،

وقت جانے کا جب آئے گا،

تو موت سے آخر کون لڑے؟

کہ وقت سنہرا پلٹے کب؟

یوں وقت بِتانا چھوڑو بھی!

اے میرے پیارے لمحہ جی!

اب خواب کا دامن چھوڑو بھی!

یوں اجڑے سے، یوں بکھرے سے

اور کب تک ایسے تنہا جی؟

اب خواب کا دامن چھوڑو بھی!

اے میرے پیار ے لمحہ جی!

Ghazal - Bikhray Bikhray Rehtay Ho

Admin — Sat, 28 Apr 2007 21:06:33 +0000

غزل

بکھرے بکھرے رہتے ہو

کیا کیا سہتے رہتے ہو

تم کو جانے کیا غم ہے

ہر دم ہنستے رہتے ہو

رستہ ہے نہ منزل ہے

پھر بھی چلتے رہتے ہو

جی اُٹھنے کی کوشش میں

اکثر مرتے رہتے ہو

تانے بکھرے خوابوں کے

اب تک بنتے رہتے ہو

اپنی باتوں پر خود ہی

اُلجھے اُلجھے رہتے ہو

لمحہ جی اس دنیا سے

تم بھی ڈرتے رہتے ہو

Tarhi Ghazal - Aaj Phir Dard Tairi Yaad Dilanay Niklay

Admin — Sat, 28 Apr 2007 21:05:58 +0000

طرحی غزل

چشمِ نم سے کہ حسابات چکانے نکلے

آج پھر درد تری یاد دلانے نکلے

ہم نے سوچا بھی نہیں تھا کہ ہماری خاطر

خونِ دل یار لیے ساتھ نبھانے نکلے

ہم نے پلکوں پہ سجائی تھی جو محفل ان کی

اشکِ بے لاگ اُسے آج بہانے نکلے

ہم تو غمخوار اُسے مان چکے تھے لیکن

چاند کے ساتھ کئی درد پرانے نکلے

اِسکی آنکھوں نے سمندر کی ادا پائی ہے

اک ذرا مدوجزر ہو کہ خزانے نکلے

تیری راہوں پہ ہلاکت کا ہے ساماں پھر بھی

جاں ہتھیلی پہ لیے تیرے دوانے نکلے

تم جو آنکھوں میں وہ اک لمحہ سجا بیٹھے ہو

ہم وہی ساعتِ غم یار بھلانے نکلے

Ghazal - Dil Say Ho Sarf e Nazar Shokh Sukhan Hai Keh Nahi

Admin — Sat, 28 Apr 2007 21:04:29 +0000

غزل

دل سے ہو صرفِ نظر شوخ سخن ہے کہ نہیں

یہ کسک دیکھ ذرا جزو متن ہے کہ نہیں

ایسے بے فیض سفر میں ہی گزر جائیںگے؟

آبلہ پاؤں کا بھی کوئی وطن ہے کہ نہیں

زیبِ تن سے ہمیں فرصت جو ملے تو دیکھیں

دلِ مردہ کو میسر بھی کفن ہے کہ نہیں

خلعتِ غم تو عطا کردی مگر سوچ ذرا

ایسی پوشاک کے شایاں یہ بدن ہے کہ نہیں

تیکھے لفظوں کی ترے کاٹ، سنا باقی ہے

جانے لہجے میں ترے اب وہ چبھن ہے کہ نہیں

تری ضو سے جو فروزاں ہے مرا مہرِ حیات

مرے خوں سے ترا گل رشکِ چمن ہے کہ نہیں

مانگ کر میں نے گزاری نہیں کیا عمر تمام؟

مرا ہر لمحہ ترے پاس رہن ہے کہ نہیں

Nazam - Adhoori Dua

Admin — Sat, 28 Apr 2007 21:03:08 +0000

ادھوری دعا

دعائے نیم شب

صدائے آرزو

وصالِ یار کے

خیال و خواب میں

جو ہو گئی مگن

تو لفظ کھو گئے

دعائے نیم شب

ادھوری رہ گئی

جو بات تھی بہت

ضروری رہ گئی

Ghazal - Khoon e Dil Pee Kar Maira Jab Gham Jawan Ho

Admin — Sat, 28 Apr 2007 21:02:30 +0000

غزل

خونِ دل پی کر مرا جب غم جواں ہو جائے گا

گردشِ دوراں کے ہاتھوں بے نشاں ہو جائے گا

ہجر کی یہ داستاں بھی وقت میں کھو جائے گی

وقت یہ بھی ایک بھولی داستاں ہو جائے گا

ضبط کی ناکام کوشش میں مرا بحرِ الم

مجھ کو کیا معلوم تھا کہ بے کراں ہو جائے گا

اُسکی یاری کے بھرم میں یہ کبھی سوچا نہ تھا

قتل گاہ پہ میرا قاتل رازداں ہو جائے گا

جس گھڑی ہم لوگ مرکے خاک میں مل جائیں گے

دیکھنا کہ اجنبی یہ آسماں ہو جائے گا

کیا خبر تھی کہ خلش پروان چڑھ جائے گی پھر

نیم مردہ درد میرا پھر جواں ہو جائے گا۔

رات کی آنکھوں میں آنسو دیکھ کر دل رو دیا

ظلمتوں کا بھی مقدر بے مکاں ہو جائے گا

دل کی مٹھی میں چھپا کر درد کو بیٹھا ہے کیوں؟

حال تیرا ، تیری نظروں سے عیاں ہو جائے گا

آپ کی محفل سے نکلے گا جو یہ شعلہ نفس

بے امان و دربدر بے خانماں ہو جائے گا

تیرا چہرہ ، میرا چہرہ، تیری سوچیں میرادل

ہجر کے شعلوں میں جل کے سب دھواں ہو جائے گا

یہ سزا ملنی تھی لمحہ ، رازداری کی تجھے

تیرے شعروں میں ترا ہر غم بیاں ہو جائے گا